CEBU, Philippines – Gipahibalo sa Philippine Drug Enforcement Agency dinhi sa Central Visayas nga andam na silang mopagawas sa listahan sa mga narco- politicians karong semanaha.
Base sa report sa GMA News.tv didto sa kaulohan, ang tigpamaba sa PDEA Derrick Carreon mikompirmar nga gimandoan sila ni Presidente Rodrigo Duterte nga ipagawas ang listahan sa mga barangay opisyal nga naa sa listahan sa mga narco-politicians karong semanahona.
Matud pa nga adunay 211 ka mga opisyal sa barangay sa tibuok nasud ang nalakip sa maong listahan. Sa 211, di momenus 20 niini ang gikan dinhi sa rehiyon.
Kahinumduman nga gibutyag sa direktor sa PDEA-7 nga si Emerson Margate nga adunay 20 ka mga niduso og certificates of candidacies sa miaging semana ang nalakip sa listahan.
Ang maong mga kandidato gustong makalingkod kon palaron sila sa umaabot nga Barangay ug Sangguniang Kabataan elections karong Mayo 14 ning tuiga.
Apan wala nila kini gihinganlan sanglit niadtong tungora wala pay direktiba gikan sa ilang mga labaw. (/IBM)(BANAT NEWS)