CEBU, Philippines — Niubos ang kaso sa dengue sa Probinsiya sa Sugbo sumala sa datos sa Cebu Provincial Health Office.
Sa unang tulo ka buwan sa tuig 2017, adunay natala nga 2,110 ka kaso ang PHO samtang sa unang tulo ka buwan niining tuiga, nakatala lang og 569 ka kaso sa dengue.
Sa Enero adunay 223, sa Pebrero 217, ug sa Marso 129 ka kaso diin upat ang natala nga patay. Sa niaging tuig, nag-una ang Siyudad sa Talisay sa may labing daghang kaso sa dengue nga niabot sa 490 samtang niining tuiga, nag-una ang Lungsod sa Minglanilla nga adunay 48 ka kaso.
Matud ni Cyril Kay Pangatungan, PHO Nurse II, nga modagsa ang report sa mga kaso sa dengue sa tingbukas sa klase ug sa panahon sa ting-uwan diin kasagaran sa matakbuyan mga bata nga nag-edad og 8-anyos paubos tungod sa weak immune system.
Nagkanayon si Pangatungan nga makatabang og dako ang pagsige og inom og tubig, saktong kaon ug saktong katulog kung biktima sa dengue.
Hugot ang kampanya sa PHO kabahin sa 4S nga mao ang “search and destroy, self-protection measures, seek early consultations, ug say yes to fogging.”
Nagkanayon si Tardy Guardiario, dengue program coordinator, gikinahanglan ang koordinasyon sa komunidad sa pagkunhod sa kaso sa dengue.
“Ang community motabang unta sila. Pero kasagaran ang mga community magsalig lang sa mga health worker,” sigun ni Guardiario. (CNU Interns/GMR) (BANAT NEWS)