CEBU, Philippines – Mahuyang nga magtutudlo sa Dakbayan sa Sugbo ang napriso sa Caoayan, Ilocos Sur human gireklamo sa usa ka menor de edad nga dance sport athlete sa Palarong Pambansa nga nigakos ug nihawok sa liog sulod sa pansayan.
Matud ni Senior Inspector Frederico Artates sa Caoayan Municipal Police Station nga ang biktima nga tinun-an sa Grade 9 sa Olongapo City National High School kuyog sa kauban niini ang nanulod sa pansayan sa NSCC Plaza dihang niabot ang suspek.
Ang suspek kinsa gitago una ang pangalan kay wala makuhai og pamahayag ang giingong nigakos sa 14-anyos dayon hawok sa liog ug lawas.
Matud ni Artates nga nangutana pa ang maong magtutudlo kung pila ang gusto nga kwarta sa biktima.
Dali nga nakapangayo og tabang ang mga biktima hinungdan dali usab nasikop ang magtutudlo.
Si Dr. Bianito Dagatan, Cebu City Schools Division Superintendent, nitug-an nga walay labot sa delegasyon ang maong magtutudlo ug tungod kay bakasyon man posibleng niapas kini sa maong lugar.
Dugang ni Dagatan nga nagpakisayud pa sila karon sa panghitabo ug nipasalig nga dili sila motabon sa maong magtutudlo kung aduna kini nahimong sala.
Ang chairman sa committee on education sa konseho sa dakbayan, Konsehal Joy Augustus Young, nikompirmar nga magtutudlo sa Dakbayan sa Sugbo ang nadakpan apan dili apil sa delegasyon.
Kuyog sa Central Visayas Regional Athletic Association sa Bohol ang maong magtutudlo apan wala na sa Palarong Pambansa.
Niangkon ang konsehal nga naluya sila sa nahimong salaud sa magtutudlo ilabi na nga Dakbayan sa Sugbo ang gidala niini.
Gitugyan ni Young ngadto sa Department of Education kung unsay buhaton nila ngadto sa magtutudlo. (/GMR)(BANAT NEWS)