CEBU, Philippines — Mokabat sa 230 ka kabus nga mga batan-on ang nakatrabaho sa mga buhatan sa lokal nga gobiyerno sa Probinsiya sa Sugbo ubos sa Government Internship Program (GIP) sa Department of Labor and Employment.
Ang DOLE nakapagawas na og kapin P1.2 milyones isip suhol sa mga benepisyaryo kinsa kadaghanan kanila nigradwar sa high school ug technical-vocational school.
Sila nakatrabaho og tulo hangtud unom ka buwan sa mga munisipyo sa Lungsod sa Madridejos, Sta. Fe, Bantayan, Daanbantayan, Medellin, San Remigio, Bogo City, Tabuelan, Talisay City, Alegria, Malabuyoc ug Ginatilan.
Matud ni Ma. Grace Diaz, DOLE-head sa Cebu Provincial Field Office (CPFO), nga ang mga benepisyaryo gitudloan sa nagkalain-laing buhatonon sama sa pag-encode ug pag-file sa mga dokumento, messengerial services, human resource, acceptance and registration of permit applications, ug assistance during job fairs ug uban pa.
Ang matag benepisyaryo gibayran sa dili moubos sa 75 porsiyento sa inadlaw nga suhulan sa ilang lugar.
Ang DOLE ang nag-ila sa pagpangapod-apod sa gikinahanglan nga mga interns sa mga ahensiya sa gobiyerno subay sa lagda sa Department of Budget and Management ug Commission on Audit.
Ang mga benepisyaryo giila gikan sa talaan sa National Household Targeting System ug priority nga mga lugar nga giila sa Joint Human Development ug Poverty Reduction Cluster ug National Economic Development Authority (NEDA) Social Development Committee.
Sa mga interesado, kinahanglan nga labing minus sa high school o tech-voc graduates ug anaa sa 18 ngadto sa 25-anyos.
Ang programa gitumong sa paghatag sa mga takus nga mga interns nga adunay oportunidad sa pagpakita sa ilang mga talento ug kahanas sa natad sa serbisyo publiko sa paglaum nga makadani sa labing maayong motrabaho sa natad sa pamulo. (PIT Intern/GMR)(BANATNEWS)