CEBU, Philippines - Kanhi drug surrenderers sa Camp Crame nga usa ka aktibong konsehal sa Barangay San Isidro, San Fernando ang gipusil patay samtang naangol ang kauban niini sa dihang padung na sila mogawas gikan sa parkingan sa gikan-ang fast food chain diha sa may General Maxilom Avenue, Dakbayan sa Sugbo, kagahapon sa kaadlawon.
Ang gipatay mao ang 1st termer nga si Kagawad Neil Abella, 46, taga San Fernando samtang naangol ang iyang kaubang si Enricclint Alesna, 41, ug wala ra maunsa ang ikatulo nila nga kauban nga si Mabel Noel,43.
Base sa imbestigasyon nila ni Senior Police Officer 3 Rommel Bancog sa Homicide Section sa Cebu City Police Office gikan nangaon sa maong kan-anan ang tulo ug dihang mogawas na sila sa parking area luwan sa awto nga gimaneho ni Abella dihang nahitabo ang pagpamusil.
Sumala pa nga nag-inusara lang ang gunman nga mipusil kang Abella makadaghang higayon. Ang duha niya ka mga kauban daling nigawas sa sakyanan ug nanagan ug nagpakitabang. Si Alesna naigo sa saag nga bala sa tuong kamot ug nalandig kini sa tambalanan.
Tulo ka basiyo sa bala sa kalibre 45 ug laing duha ka wala matinong bala ang nakuha diha sa crime scene. Ang konsehal nakaangkon og samad pinusilan sa iyang nawong ug liog.
Si Abella, nitahan sa iyang kaugalingon kuyog sa miangkong drug lord nga si Franz Sabalones didto sa Camp Crame niadtong 2016 sa dihang milingkod na si Pres. Duterte.
Human niadto mi-surrender kini sa San Fernando Police Station niadtong Nobiyembre 2016.
Si Cebu City Police Office Director Senior Supt. Joel Doria miingon nga anggulo sa kalambigitan sa ilegal nga drugas ang ilang gitan-aw sa maong pagpatay.
Ang hepe sa San Fernando Police Station nga si Chief Inspector Adrian Nalua miingon sa Banat News nga tinuod nga anaa sa ilang drug watchlist ang kagawad ug mitug-an kini kanila nga mihatag kini sa lista sa mga drug personalities didto sa Camp Crame.
“Unlike before, tagsa ra namo siya makit-an diri. Pero aktibo gihapon siya sa pakigbatok sa drogas sa ilang barangay. Always present na siya sa among BADAC (Barangay Anti-Drug Abuse Council) meetings,” sigun pa sa maong hepe.
Laing gibutyag ni Nalua nga niadtong Mayo 20, 2017 nadakpan sa buy bust operation gawas sa panimalay sa kagawad ang pag-umangkon niini nga si Leevan Abella ug nakuhaan og lima ka paketeng shabu.
“Di mi makaingon nga nibalik gyud ni siya (kagawad) sa pagpamaligya og shabu kay sa gawas ra man sa iyang balay nadakpan iyang pag-umangkon,” ang maong hepe miingon. (Rowena Capistrano, ug Jomelyn Largado,CNU Intern/IBM) (BANAT NEWS)