CEBU, Philippines — Ang mga kawani sa Office of the Building Officials (OBO) dili maka-inspection sa mga building dinhi sa dakbayan sa Sugbo tungod kay kuwang sila og mga sakop.
Tungod niini, risgo kaayo kon ang mga tag-iya ug tagdumala sa mga building dili motuman sa balaod, ilabi na ang pagsiguro nga ang ilang buildings adunay fire exits nga magamit dayon panahon sa emerhensya.
Si Engr. Josefa “Joy” Ylanan, hepe sa OBO, miingon nga 32 ra ang iyang mga sakop ug dili kini takus nga mosuhid sa 80 ka barangay sa dakbayan aron pagtan-aw kon ang mga building nakatuman ba sa balaod. Ang OBO giawhag sa Cebu City Council nga susihon ang mga building dinhi sa dakbayan kon hitsas ba kini sa fire exits. Si Konsehal Jerry Guardo nga maoy tsirman sa Committee on Infrastructure, nakabantay nga may mga building nga wala’y fire exits.
Matud ni Ylanan nga ang pagbutang og fire exits sa mga building usa sa gilatid sa Fire Code of the Philippines mao nga nagpatabang sila karon sa Bureau of Fire Protection (BFP) pinaagi ni City Fire Marshal Noel Ababon.
Dunay report nga miabot sa OBO nga usa ka dakong tindahan duol sa Basilica del Santo Niño wala na mogamit sa ilang fire exits human nila gi-renovate ang building.
Gipasabot ni Ylanan nga apil gyud ang mga opisyal sa dakbayan sa Sugbo nga mabasol kon may mahitabo sa mga tawo nga dili makagawas sa building kon may emerhensya kay wala’y fire exits.
Tungod niini, si Ylanan miawhag sa mga tagdumala sa mga building nga tumanon gyud unta nila ang balaod nga gitumong aron sa paghatag og siguridad sa mga tawo nga anaa nagtrabaho sa ilang edipisyo. (Mary Mel V. Coma ug Rejena M. Sevilla, PIT Interns/RUB) (BANAT NEWS)