CEBU, Philippines — Niabot sa 21 ka ilegal nga makina ang nasakmit sa kapolisan sa Dakbayan sa Talisay sa managlahing barangay kagahapon sa buntag. Si SPO1 Jason Del Campo sa Talisay City Police Station nagkanayon nga ilang gisulod ang Barangay Cansojong ug Tangke diin sila nakasakmit og 15 ka ilegal nga makina.
Samtang ang grupo ni SPO4 Roger Omolon nakakuha sab og unom ka ilegal nga makina.
Si Del Campo niingon nga aduna’y mga nihangyo kaniya nga dili ipadala ang ilegal nga makina tungod kay padulong na nga habwaon apan ila gyud kining gidala. Si Supt. Marlu Conag, hepe sa kapolisan sa Dakbayan sa Talisay, niingon nga gawas sa ilang kampanya batok sa ilegal nga drugas padayon sab ang ilang operasyon batok sa ilegal nga sugal.
Iyang gidasig ang katawhan sa pagsumbong kanila sa mga ilegal nga kalihukan sa ilang lugar ug iyang gipasalig nga ila gyud kining aksyonan. (GMR) (BANAT NEWS)