CEBU, Philippines — Posibleng ipatuman sa Department of Education- Dangerous Drugs Board Regulation ang random drug testing sa secondary ug tertiary levels sa mga tunghaan sa dakbayan sa Sugbu niining umaabot nga pagbukas sa klase.
"This is not to sanction them na dili na sila ma-enroll but this is to help a drug dependent rehabilitated and to take action if one student will be caught positive. It is not to file a case against them but to help the family of course," asoy ni Cebu Provincial Anti-Drug Abuse Office Director, Carmen Remedios Durano-Meca.
Hugot nga gipatuman ang kampanya batok illegal nga drugas pinaagi sa paglusad og mga programa sa gobiyerno sama sa "Barkada Kontra Druga Movement" nga ipatuman pag-abli sa klase.
Mopahigayon usab sila og campus tours sa elementarya, sekondarya ug bisan sa kolehiyo aron mas mapalig-on ang kaalam sa mga estudyante batok sa negatibong epekto sa drugas.
Masaligon si Meca nga molampos ang maong programa pinaagi sa pagtabang sa mga nagkalain-laing ahensya sama sa Department of Education, social welfare, Department of Health, ug Department of the Interior and Local Government (DILG).
Samtang gipahibalo ni Meca, niadtong Disyembre sa niaging tuig, mas daghan ang mga menor de edad nga lalaking nalambigit sa ginadiling drugas nga miabot og 97 porsiyento ug tres porsiyento lang ang mga babaye.
Sumala pa nga nakatala sila og 1, 933 ka mga menor de edad nga nalambigit sa ginadiling drugas nga nitahan tungod sa gihingusgang Oplan Tokhang. (Caren Abing, CNU Interns/IBM)(BANAT NEWS)