CEBU, Philippines — Moabot 20 ka mga balay ang naugdaw sa sunog nga niulbo kagahapon sa udto sa may Sitio Kalubihan, Barangay Guadalupe ning Dakbayan sa Sugbo.
Nadawat sa kabomberohan ang alarma sa sunog alas 12:47 ug nakontrolar ala 1:18 sa hapon.
Matud pa ni Senior Supt. Samuel Tadeo, Regional Director sa BFP-7 base sa inisyal nga imbestigasyon ang sunog nagsugod sa panimalay ni Norberto Ermitano ug giingong batang nagduwa-duwa og posporo maoy gituohan nga sinugdanan sa kayo apan ipatawag pa nila ang tagbalay aron palawman ang imbestigasyon.
Sumala pa ni Tadeo, 20 ka mga panimalay ang hingpit nga naugdaw ug gibana-bana nilang mokabat sa P150 mil ang danyos sa maong sunog.
Wala hinuoy natala ang kabomberohan nga naangol o nakalas sa maong insidente. Gipaabot nga posibleng mosaka o mokubos ang gidaghanon atol sa hingpit na usab unya nga pagsusi sa Department of Social Welfare and Services.
Samtang kasagaran sa mga nasunogan ang wala kaayo makabitbit og mga kabtangan tungod sa kakalit sa maong sunog ug sudlonon kaayo ang balay diin nagsugod ang sunog. (BANAT NEWS)