CEBU, Philippines — Patay na nga napalgan ang daku nga pawikan sa baybayon sa Barangay Ibo, Dakbayan sa Toledo kagahapon sa udto.
Ang pawikan gibana-bana nga adunay gitas-on nga 1.4-metros ug gilapdon nga usa ka metro ug gituohang sobra na sa 15 ka tuig ang pangedaron niini. Matud ni Jean Espina, kawani sa Department of Agriculture, nga human nila nadawat ang taho dali nila kining gisusi.
Ang mga tinun-an sa Ibo Elementary School ang giingong unang nakakita sa patay nga pawikan.
Ang patay nga pawikan napalgan nga natunga ang lawas ug hapit na madugta.
Gituohang naigo sa barko ang pawikan, namatay ug napadpad sa baybayon.
Niadtong 2016 adunay napadpad sab nga patay nga pawikan sa maong lugar. (BANAT NEWS)