CEBU, Philippines — Ang mga ilegalista giingong padayon gihapon sa pagpahigayon og ilegal nga panagat diha sa kadagatan sa siyudad sa Talisay.
Kini maoy gitug-an ni Gregorio Dela Torre pangulo sa Fisheries Sea Ecological Care (FISECA).
Matud niya nga nigara ang mga ilegalista tungod kay sila nga tinugyanan sa kadagatan kuwang sa kagamitan aron sila makadakop sa mga badlungon.
Ang FISECA adunay tulo ka motor-banca apan tungod sa kahinay niini modagan maglisud sila og gukod sa nagpahigayon og ilegal nga panagat.
Si Dela Torre nagkanayon nga mosamot ang ilang problema kong dunay mosulod nga commercial fishing vessel nga mogamit og gagmay’ng mata nga pukot.
Subay niini, si Alvin Santillana pangulo sa City Disaster Risk Reduction and Management Office (CDRRMO) nibutyag nga posibleng karong tuiga mapalit na nila ang speed boat nga gustong maangkon sa taga FISECA diin ang maong sakyanan sa dagat makatabang sa ilang paggukod sa mga ilegalista.
Matud ni Santillana nga duna sila’y gigahin nga P1.5 milyones nga pundo alang sa pagpalit og speed boat ug laing P250 mil alang sa rubber boat diin maggamit kini sa FISECA sa pagtubag sa mga alarma diha sa kadagatan.
Gibana-bana nga magamit ang speed boat ug rubber boat sa ikaduhang quarter niining tuiga.
Si Dela Torre sa iyang bahin, nagkanayon nga dakong tabang ang maong mga sakyanan sa ilang operasyon sa pagsumpo sa ilegal nga panagat sa siyudad. (BANAT NEWS)