CEBU, Philippines — Mga hinginom og softdrinks nakurat kagahapon kay nakabantay sila nga misaka na ang presyo sa kinaham nila nga ilimnon, apan may mga nalipay sab sa pagmahal na sa kantidad sa soft drinks.
Matud ni Radito Empleo, taga Barangay Pahina Central, nga wala ra siya maapektohi sa pagsaka sa presyo sa soft drinks kay wala na man siya moinom niini tungod sa iyang sakit nga diabetes.
Ang pagsaka sa presyo sa mga softdrinks resulta kini sa bag-ong balaod nga gipirmahan ni Presidente Duterte nga magpausbaw sa buhis sa mga tam-is nga ilimnon, apil ang fuel products.
Si Empleo miingon nga dili siya pabor sa maong balaod nga magpasaka sa presyo sa palaliton kay maapektohan man tanang tawo, ilabi na kadtong manginom og softdrinks.
Samtang si Roy Sauro, usa sa mga manindahay sa kadalanan, nitug-an nga wala pa siya mopausbaw sa presyo kay nagpaabot pa siya sa delivery sa iyang mga soft drinks gikan sa iyang komprahanan.
Apan matud ni Sauro nga ang sigarilyo nabatyagan na nila ang pagsaka sa presyo, apan bisan pa niini duna gihapo’y mga tawo nga mopalit.
Nag-obserbar pa ang mga namaligya og softdrinks ug sigarilyo kon unsay epekto sa pagpatuman sa Tax Reform for Acceleration and Inclusion (TRAIN) law nga maoy nagpasaka sa buhis sugod Enero 1.
Samtang sa usa ka convenience store, ang 2 liters nga soft drinks nga kaniadto nagkantidad og P59, karon gibaligya na sa kantidad nga P76. (BANAT NEWS)