CEBU, Philippines - Gihangyo sa Hunta Probinsiyal sa Sugbo ang Department of Public Works and Highways (DPWH)-7 sa pag-rehabilitate sa alternatibong karsada gikan sa mga Lungsod sa Balamban, Asturias ug Tuburan ilabi na sa Barangay Antipolo paingon ngadto sa Santo Niño ug Sta. Lucia paingon sa Lunas.
Kini aron ang mga motorista dili maglisud sa pag-agi samtang giugmad pa ang bag-ong tulay sa Barangay Bago, Asturias.
Sila si Bokal Victoria Corominas-Toribio, Alex Binghay ug Edsel Galeos nagkanayon nga ang mga motorista mapugos og tadlas sa alternatibong karsada sa nahisgutang mga lugar tungod sa pagtukod sa bag-ong tulay.
Ang maong alternatibong karsada kinahanglan nga hatagan usab og pagtagad tungod kay gubaon kini ug nakahatag og kahasol ngadto sa mga motorista nga moagi.
Dugang sa nahisgutang mga opisyal nga ang probinsiya dunay katungod nga mohatag og kasayon sa mga konstituwente ilabi na sa kaluwasan sa publiko. - /GMR) (BANAT NEWS)