CEBU, Philippines - Gipasaka na sa grievance committee sa Provincial Health Office (PHO) ngadto sa Committee on Discipline and Investigation (CODI) ang reklamo batok sa hepe sa Minglanilla District Hospital nga si Dr. Bella Villaganas.
Ang hepe sa CODI Atty. Orvi Ortega mibutyag nga sa milabay’ng semana nasang-at ngadto sa CODI ang reklamo batok kang Villaganas.
Si Villaganas gipaduso og eksplinasyon sulod sa lima ka adlaw kabahin sa giingong giimplementar niining patakaran sa tambalanan kabahin sa paggamit sa ambulansiya hinungdan nga wala ma-rescue ang usa ka tawo kinsa nabiktima sa hit and run.
Giingong ang probinsiya adunay giluwatan nga memorandum sa paggamit sa ambulansiya diin kung ugaling dunay sama nga emerhensiya nga mahitabo ang unang moresponde ang ambulansiya sa lokal nga kagamhanan sa lugar nga nahitaboan.
Ug kung wala ang ambulansiya sa kagamhanan sa lungsod o siyudad ang ambulansiya na sa tambalanan ang moresponde sa emerhensiya.
Gikataho usab nga sa giluwatan nga patakaran ni Villaganas sa paggamit sa ambulansiya walay gibutang nga “specification” kanus-a pwedeng magamit ang ambulansiya sa tambalanan nga nakahatag og kalibog sa mga nurses.
Ang maong patakaran giingong iyaha lang ni Villaganas ug wala kini pagtugot gikan sa probinsiya.
Matud ni Ortega nga makasumitir o dili makasumitir og eksplinasyon si Villaganas, ang CODI mopahigayon gyud og preliminary conference.
Ang eksplinasyon ni Villaganas ipaubos sa evaluation sa CODI apan kung wala siya’y eksplinasyon personal kining paatubangon sa CODI aron motubag sa mga pangutana kabahin sa hitabo.
Subay niini, si Bokal Christopher Baricuatro, chairman sa committee on health sa hunta probinsiyal nagkanayon nga gipatawag sa hunta probinsiyal ang hepe sa PHO Dr. Rene Catan ug si Villaganas.
Si Catan ug Villaganas gikatakdang patambongon sa sesyon sa hunta probinsiyal karong Lunes. (BANAT NEWS)