CEBU, Philippines – Duha ka mga lalaki ang gipamusil usa kanila ang patay diha sa Upper Calajoan, Lungsod sa Minglanilla.
Namatay si Joey Arganza Go, 32, nagpuyo sa Riverside Kalubihan, Upper Calajoan, Minglanilla samtang naangol si Shawn Benson Repollo Sedeno, 26, usa ka habal-habal driver nga nagpuyo usab sa maong barangay.
Base sa imbestigasyon ni Police Officer 3 Arnel Resente, nag-estambay sa tindahan ang mga biktima dihang adunay duha ka lalakeng nagsakay og endure-type nga motorsiklo ang kalit nga namusil kanila.
Bisan nasamdan na, nakadagan pa si Go apan gigukod sa gunman ug gipusil sa ulo.
Samtang si Sedeno natapsingan sa nawong apan gikatahong talandugon sa tambalanan tungod sa kadaghang dugo nga nawala gikan niya.
Wa mailhi ang duha ka suspek tungod kay gawas sa kadali nakaipsot, nagsul-ob ang duha og bonnet.
Matud ni PO3 Resente nga nakakita ang amahan ni Sedeno sa maong panghitabo ug misuway kini og gukod sa mga mamumuno apan kusog sila kaayo nga nakapadagan.
Gisubay pa sa kapolisan ang motibo sa maong pagpamusil ug usa sa anggulo nga ilang gitan-aw nga posibleng ilegal nga drugas ang hinungdan niini. -/EIM (BANAT NEWS)