CEBU, Philippines - Bisan sa pagsaka sa presyo sa krudo karong adlawa og P0.65 matag litro ug sobra sa P1 matag litro sa niaging semana, walay plano ang CITRASCO nga usbon ang ilang petisyon nga P1 nga umento sa plite sa jeepney.
“Di lang nako i-amend ang maong petisyon. Piso lang gihapon,” matud ni Ryan Benjamin Yu, general manager sa CITRASCO.
Nipasaka na sa ilang petisyon ang CITRASCO sa pag-umento og piso sa minimum fare sa jeepney sa Land Transportation Franchising and Regulatory Board-7.
Si Julieto Flores, tigpamaba sa Cebu Provincial Bus Operators Association, nipahibawo nga wala sab silay plano nga pasakaan ang bus fares.
“Di lang sa mi mopasaka kay makaya pa. Serbisyo publiko man ning amoa,” matud ni Flores.
Si Arman de Gracia, presidente sa Nagkahiusang Drayber Alang sa Reporma, mopasaka sila og P1.50 nga umento sa plitehan sa jeepneys.
Samtang ang Basak-Lapu-Lapu City Jeepney Operators and Drivers Association Inc- National Confederation of Transportworkers Union-Visayas, buot sab mopasaka sa maong kantidad.
Gawas sa diesel, ang presyo sa gasolina nisaka sab og P0.45 matag litro ug P0.60 matag litro sa kerosene. (BANAT NEWS)