CEBU, Philippines - Tungod lang sa P80 nga shabu nausik ang kinabuhi sa 4-anyos nga anak sa usa ka polis human kini gidunggab sa silingang gidudahang nagumon sa ilegal nga drugas diha sa Brgy. Duljo-Fatima ning Dakbayan.
Nagbangutan karon ang pamilya sa batang si Emmanuel Martinez Jr., samtang giandam na ang kasong murder in relation to child abuse batok sa suspek nga si Danilo Remulta.
Ang amahan sa bata nga si Police Officer 1 Emmanuel Martinez miingon nga gusto nilang madugta sa prisohan si Remulta. Matud niya dili siya makapasaylo sa gibuhat niini ngadto sa ilang anak.
Si Remulta nangayo og pasaylo sa iyang nabuhat ug miinsister nga nakadungog siya og tingog sa mga bata nga nagbugalbugal kaniya maong nahimo niya kadto sa bata.
Siya miangkon nga sa miaging adlaw nakasuyop siya og P80 nga balor sa shabu ug nagbinuntagay siya og inom. Human niadto sige na siyang makadungog og tingog nga nagbugalbugal kaniya.
Apan si Martinez miingon nga dili bugal-bagalon ang iyang anak, kanunay kini magduwa sa lugar diin nahitabo ang krimen kay gihimo na kining susama og playground sa mga bata.
Siya mitug-an nga sakit kaayo para kaniya ang kamatayon sa iyang anak tungod kay nakapaduol pa kini kaniya ug nagpatabang ug nisumbong nga gidunggab kini sa suspek.
Si Emman nga maoy angga sa bata magsaulog unta sa iyang ika-5 ka tuig nga adlaw nga natawhan karong Abril 16. Matud sa amahan pangandoy unta usab niining mahimong polis.
Nanawagan karon si Martinez sa mga nagpayuhot og ilegal nga drugas sa paghunong na niini aron wala nay mga inosente nga maangin sama sa nahitabo sa iyang anak.
Si Police Senior Inspector Eduard Sanchez, ang hepe sa Mambaling Police Station miingon nga gipaabot nila ang Death Certificate sa bata aron ilang mapasaka ang kaso. (BANAT NEWS)