CEBU, Philippines - Nanawagan si Konsehal Dave Tumulak sa iyang mga kaubanan sa konseho ilabi na ang mga sakop sa Team Rama nga hunungon na ang away sa politika kay panahon na karon nga maghiusa sila alang sa kaayuhan sa siyudad kay mao kini ang gikinahanglan sa katawhan.
Gipasabot ni Konsehal Tumulak nga kun gihigugma sa iyang mga kaubanang konsehal ang mga Sugbuanon ug kun buot nila nga moserbisyo sa katawhan, mas maayo nga makig-alayon na lang sila sa administrasyon karon. Kini aron mapakita nila nga usa ra ang ilang tumong ug kini mao ang pagpalambo sa siyudad, paghatag og kaayohan ug pagtabang sa mga nanginahanglan.
Alang kang Tumulak angayan na nga mo-move on ang mga konsehal dungan sa pag-ingon nga ang iyang mga kaubanan sa konseho aduna’y tagsa-tagsa ka talento.
Subay sa maong panawagan, si Konsehal Garcia aduna’y apelar kang Tumulak ug kini mao nga dili mosulti og bati batok sa mga konsehal sama sa giingong pamahayag niini kang Cuenco.
Giklaro usab ni Garcia nga welcome alang niya ang gusto ni Tumulak, gani mao kini ang gibuhat sa iyang mga kaubanan.
Sigon sa konsehal nga sayod ang kadaghanan nga wala nila babagi ang programa sa administrasyon karon. Gihimug-atan niini nga aduna’y mga higayon nga dili magkatakdo ang ilang mga baruganan maong aduna’y mga pangutana nga mahitabo. (BANAT NEWS)