CEBU, Philippines - Lima ka gramos sa gituohang drugas, mga cellphones ug hait nga hinagiban ang nasakmit sa sulod sa Cebu City Jail kagahapon sa kaadlawon atol sa gihimong Greyhound Operation nga gipahigayon sa mga operatiba sa Philippine Drug Enforcement Agency-7, inubanan sa sakop sa pulis ug sa Bureau of Jail Management and Penology-7.
Nagkanayon si PDEA-7 Regional Director Yogi Ruiz nga mao kini gimando kanila ni Cebu City Mayor Tomas Osmeña.
Gawas sa maong mga kontrabando adunay nakuha nga notebook gikan sa usa ka inmate nga dunay nakalista nga mga pangan.
“Naa mi nakit-an nga mga listahan. Mao amo tong conductan og further investigation. Kay naka-lista mga tao ug kinsa kining iyahang gihatagan og shabu ila iyahang kolektahonon,” matud ni Ruiz.
Ang tag-iya sa maong notebook usa ka inmate nga usa ka drug pusher nga napriso sulod na sa upat ka tuig, apan wa panganli ni Ruiz, tungod sensitibo kini nga isyu sa pagkakaron.
Naa sab silay nakit-ang usa ka cabinet nga napuno sa paninda ug mihangyo daw ang tag-iya niini nga dili gub-on kay mao kini ang gisaligan sa iyahang pamilya, dugang ni Ruiz.
“Nihangyo siya nga, ‘sir ayaw lang ninyo gub-a akoang butangan kay naa diri akong paninda.’ Naa man siya’y paninda didto nga sabon – sari sari store nga gamay. Mao daw gisaligan sa iyahang pamilya,” tataw ni Ruiz.
Nagduda si Ruiz nga posibleng nakahibalo nang daan ang mga inmates sa operasyon kay sa pag-abot nila didto nagkiat ra sila kun itandi sa mga inmates sa Cebu Provincial Detention and Rehabilitation Center.
Nagkanayon si Ruiz nga gipahubo gihapon sa mga operatiba ang mga inmates alang sa seguridad sa tanan samtang gipahigayon ang operasyon.
“Gipahubo gihapon. Pero walay picture. Bahala na ang human rights diha.
Bahala na unsay isaway sa human rights basta dili lang ma- compromise ang atoang safety,” matud ni Ruiz. - /EIM) (BANAT NEWS)