CEBU, Philippines - Gihingusgan sa Department of Veterinary Medicine and Fisheries sa Dakbayan sa Sugbo ang kampanya batok sa mga kontaminadong karne labi na sa Carbon Public Market.
Kini human nakasakmit na sab ang maong ahensiya og 43.9 ka kilos nga mga ulo ug tinai sa manok sa maong merkado nga nanimaho na ug may nana.
Matud ni City Veterinarian Alice Utlang nga sukad Enero hangtud kagahapon nakasikop na sila og 1,314 ka kilos nga mga kontaminadong karne sama sa mga manok, tibuok nga baka ug baboy.
Ang uban gisikop tungod sa mishandling ug meat deterioration.
Giawhag ni Utlang ang mga konsumedor sa pagsusi sa inspection certificate sa karne, mopalit sa ilang suki, ug simhuton.
“Di lang mopalit dayon kay barato. Okey og barato basta segurado,” tambag ni Utlang.
Alang sa mga mamaligya, matud ni Utlang nga magbutang sad sila og konsensiya ug dili kay hunahunaon ang ganansiya lang.
“I hope di sila mag-wait nga makasuhan ug mamultahan sila basin ulahi na ilang pagmahay kung ang balaud amo gyung fully ipatuman,” dugang ni Utlang. (BANAT NEWS)