CEBU, Philippines - DILG-7 Regional Director Rene Burdeos, nibisita kagahapon sa CPDRC aron susihon ang kahimtang sa mga inmates human namantala ang hubo nilang mga hulagway sa gipahigayong greyhound operations sa mga sakop sa PDEA-7 sa nilabay nga semana.
Matud ni Burdeos, igo lang silang nisusi sa kondisyon sa mga priso ug iyang nakita ang grabe nga kahuot ug nagsugwak na ang maong prisohan.
Mopahigayon pa sila og mga panagtagbo aron makahimo sila og rekomendasyon nga ilang ipadala sa ulohang buhatan labot sa kahimtang sa maong pasilidad. Gitug-an ni Burdeos, initiative nila ang pagpahigayon og pakisusi sa provincial jail aron sila masayod sa kahimtang sa sulod. Kini gikumpirmar ni Bobby Legaspi, ang OIC Jail Warden sa CPDRC.
Dugang ni Legaspi, mas maayo nga nakita sa director sa DILG-7 ang kahimtang sa CPDRC aron iyang mahibaw-an kun nganong gikinahanglan nga huboan sila kun adunay himoong greyhound operations.
Samtang gipahibawo sa Commission on Human Rights nga mopahigayon sila og dayalogo karong adlawa uban ang PDEA-7, pamunuan sa CPDRC ug Cebu Provincial Police Office aron tukion ang mga angay ug dili angay alang sa mga priso.
Matud ni Atty. Arvin Odron, ang Regional HR Director sa CHR nga anaa na sila sa katapusang hugna sa imbestigasyon diin mokuha sila og pamahayag gikan sa lalaki ug babayeng inmates. Sumala pa ni Odron, kauban nila sa pagpatuman sa pagprotiher sa tawhanong katungod ang mga law enforcement agency, hinungdan mopahigayon sila og dayalog aron matan-aw ang mga palisiya ug mapuno ang standard human rights.
Gitug-an ni Odron nga ilang tukion karon atol sa ilang dayalog ang mga butang nga magpabilin gihapon ang dignidad sa usa ka tawo bisan kun kini usa ka priso ug malikayan usab nga masubli ang susamang hitabo sa CPDRC. (BANAT NEWS)