CEBU, Philippines - Usa ka konsehal sa dakbayan sa Sugbo ug unom ka barangay kapitan nga parehong alyado sa Team Rama nag-atubang karon og kaso sa hukmanan ug gipaabot nga ipadakop na sa huwes tungod sa wala nila pag-uli dayon sa sakyanan nga giisyu kanila sa City Hall.
Ang mga sinumbong mao sila si Konsehal Joel Garganera nga kanhi kapitan sa Barangay Tinago; Kapitan Anna Tabal (Tagba-o), Kapitan Rosalita Callino (Buot-Taop), Kapitan Lemar Alcover (Sambag 1), Kapitan Ramil Ayuman (Apas), Kapitan Philip Zafra (Tisa), ug Kapitan Yolandito Cagang (Basak-Pardo).
Si City Prosecutor Liceria Lofranco-Ravillas mipasaka og kaso batok sa pito ka opisyal didto sa Municipal Trial Court in Cities (MTCC) tungod sa paglapas sa Article 221 sa Revised Penal Code ug mirekomendar og piyansa nga P6 mil matag usa kanila.
Matud ni Prosecutor II Benison Harayo nga adunay basehanan ang reklamo nga gisang-at ni kanhi acting mayor Margot Osmeña nga ang pito ka opisyal nakalapas sa balaod diha nga nagpadiki-diki sila sa pag-uli sa sakyanan sa City Hall aron mahimoan og imbentaryo.
Ang maong balaod naglatid nga ang mga opisyal ug kawani sa kagamhanan mahimong masilotan kun dili sila mouli dayon sa mga butang sa gobiyerno nga gipagamit kanila kun idemanda na sa property custodian. Si Garganera miingon nga wala pa sila makadawat og warrant of arrest gikan sa korte apan andam sila mobutang og piyansa. Gihulagway ni Garganera nga usa kini ka pagpanghasi kanila kay dili man sila kaalyado sa administrasyon sa dakbayan.
“Ila lang tingali ta nga gikalingawan, naa man sila sa poder, unya dili man ta nila kaalyado so ila tang gisuwayan og tayhop ba, gisuwayan sad ta nila og hadlok,” matud ni Garganera.
Kahinumduman nga si Kapitan Ayuman mipasaka usab og administrative complaint didto sa Malacañang batok nila ni Mayor Osmeña ug asawa nga si Konsehal Margot Osmeña gumikan matud pa sa pagbukas nila og balik sa Inayawan Landfill bisan pa sa mga kalapasan. (BANAT NEWS)