CEBU, Philippines - Gibuhian ra usab niadtong Biyernes sa hapon ang 51-anyos nga lalaki kinsa mi-hostage sa iyang bilas sud sa usa ka oras.
Gipahibawo ni SPO2 Meliton Agadier, imbestigador sa maong kaso sa Lungsod sa Argao nga nakadesidir ang biktima nga si Marife Onque, silingan ra sab sa suspetsado nga si Donato Rabi nga taga Barangay Binlod nga dili na lang mopasaka og kaso.
“Ang suspek murag naay nervous breakdown mao naka-decide ang biktima nga patambalan na lang ug dili mopasaka og kaso,” matud sa polis.
Matud ni Agadier nga alas 12:15 sa udto nadawat nila ang taho nga adunay hostage-taking sa nahisgutang lugar.
Sa ilang pagtubag sa maong alarma, ilang naabtan si Rabi nga gadala og sanggot nga gition sa liog ni Onque.
“Sud nato sa tunga sa oras nga ing-adto,” matod ni Agadier.
Sud sab sa laing 30 ka minutos nakigsabot sila sa suspek apan nagdumili kini pagtahan. Pagtaud-taud nidemanda kini nga gusto siyang makighinabi kang PO1 Jorge Parantar sakop sa Argao Police ug nagpuyo sa Barangay Binlod.
“Among gitawagan si PO1 Parantar ug iya gyud napa-surrender ang suspetsado,” matud ni Agadier. Gibutyag sab sa polis nga bag-ohay lang nabiyudo ang suspek. - /DILT) (BANAT NEWS)