CEBU, Philippines - Wala pay napirmahan nga legal nga dokumento ang nilingkod nga mayor sa Dumanjug, Rene Asentista, sukad sa iyang paglingkod sa katungdanan.
Si Asentista niangkon nga ang Land Bank of the Philippines (LBP) nitawag sa iyang buhatan aron pagklaro sa pipila ka mga rekisitos sama sa “oath of office” aron siya makapirma sa mga dokumento sa maong bangko diin apil na niini ang payroll sa mga empleyado sa lungsod.
Si Asentista nilingkod sa katungdanan human ang Ombudsman nimando sa pagtangtang kang Mayor Efren Guntrano Gica may labot sa kasong dishonesty ug grave misconduct.
Si Asentista kinsa kaalyado ni Gica nagkanayon nga siya nilingkod sa puwesto apan wala pa nakahural.
“Wala pa ta naka-oath of office. Ni-assume ra ko kay automatic mana,” matud ni Asentista.
Siya nidugang nga plano niya nga manumpa atubangan ni Gobernador Hilario Davide III karong adlawa o sa Lunes. (BANAT NEWS)