CEBU, Philippines - Nisumitir na sa ilang tagsa-tagsa ka marine protests ang mga kapitan sa MV St. Braquiel sa SuperCat ug SMC Barge No. 8 nga nagbangga ubos sa Mandaue-Mactan Bridge niadtong Sabado sa gabii.
Matud pa ni Coast Guard Cebu District commander Dionelitt Ampil nga sulod ning semanaha ilaha nang sugdan ang pormal nga Marine Casualty Investigation human nila natigom ang tanang mga papeles kabahin sa maong panagbangga.
"The purpose of our investigation is not to determine who is at fault but to determine kung ano ang nangyari then it is up to management of the respective vessel to file a case," matud pa ni Ampil nga nahinabi sa Banat News.
Sa iyang bahin, si Angelito Salvio, ang general manager sa SuperCat nagkanayon nga ang maong barge nibiyahe kini nga walay suga ang luyo hinungdan nga wala kini makita sa ilang barko.
Matud pa ni Salvio nga di maklaro sa radar nga adunay "object" sa unahan labi na kung ang barko anaa sa ubos sa maong bridge.
"At 10:10pm, one lookout however, sighted an unlighted and unmanned vessel ahead swinging towards the vessel and quickly informed the shipmaster, who instantly initiated the engine full stop and evasive maneuver. Unfortunately, MV St. Braquiel bow hit the portside quarter of the unidentified barge," matud pa ni Salvio sa iyang press release.
Nagkanayon usab si Salvio nga kadtong mga pasahero nila nga wa matagbaw sa medical assistance nga gihatag sa hospital, pwede mobisita sa ilang opisina aron kini mabalik sa hospital kung buot niini mopahigayon og x-ray ug uban pang mga medical procedures.
Ang MV St. Braquiel adunay 90 ka mga pasahero, diin 58 niini ang nangaangol apan 25 lang ang na admit sa hospital.
Ang tugboat, M/TUG PSC Matatag nga maoy nagguyod sa maong barge adunay siyam ka mga crew nga wala ra maunsa.
Ang St. Braquiel gikan sa Ormoc, Leyte samtang ang SMC Barge no. 8 gikan kini sa Estancia, Iloilo diin nagkarga kini og mga walay sulod nga botelya sa beer. Mitchelle L. Palaubsanon ug Rowena Capistrano (BANAT NEWS)