CEBU, Philippines - Duha ka mga transport groups sa Sugbo miduso sa ilang tagsa-tagsa ka petisyon aron sa pagpausbaw sa pletehan sa public utility jeepneys.
Ang nipetisyon mao ang Cebu Integrated Transport Service Multi-purpose Cooperative (CITRASCO) ug ang Basak Lapu-Lapu City Jeepney Operators and Drivers Association Inc.(BALACJODA)- National Confederation of Transportworkers Union-Visayas ngadto sa Land Transportation Franchising and Regulatory Board-7 kagahapong adlawa.
Ang CITRASCO buot mopasaka og P1.50 sa minimum nga pletihan sa jeepney gikan sa alas 7 sa buntag hangtud alas- 9 ug alas- 5 hangtud alas 7 sa gabii nga gitawag nila nga dili rush hours tungod kay alkanse sila sa biyahe tungod sa traffic.
Apan ang BALACJODA nangayo gyud og P1.50 sa rush hours ug laing P1.50 nga usbaw sa minimum nga pletihan.
Buot pasabot nga kung tugotan ang petisyon sa BALACJODA P9.50 na ang pleti sa rush hours ug P8 kun dili rush hour.
Si LTFRB-7 regional director Ahmed Cuizon nagkanayon nga usahon lang og public hearing ang duha ka petisyon.
Giawhag ni Cuizon ang publiko nga motambong gyud sa public hearing aron madungog ang ilang sentimiyento bahin sa petisyon. (BANAT NEWS)