CEBU, Philippines - Hayan pasakaan og kaso ang mga kanhi traffic enforcers nga dili na konektado sa City of Talisay-Traffic Operation Development Authority (CT-TODA) nga nagpadayon gihapon sa pagpangsita ug pagpanakop sa mga malapasong motorista.
Nahibaw-an ni Almond dela Peña ang kalihukan sa mga impostor niadtong Biyernes sa hapon dihang aduna silay gisita nga drayber sa dump truck sa Barangay Lawaan. Apan ang drayber nipahibawo kanila nga humana siya gidakop sa mga enforcers sa South Road Properties (SRP) duol sa fish port.
Si dela Peña nagkanayon nga nasurprisa siya gumikan kay wala siyay gimanduan nga enforcer nga adto moplastada sa lugar. Sa iyang pag-adto iyang naabtan ang duha nga nagsul-ob pa sa ilang green nga uniporme sa CT-TODA.
Ang duha nagdali-dali sa pagsibat sakay sa motorsiklo hinungdan nga gipa-blotter ni dela Peña ang maong insidente.
Iduso niya sa City Legal Office ang maong problema ug posible nga pasakaan sila og kaso kun dili isurender sa mga impostor nga traffic enforcers ang mga citation tickets. Si dela Peña nitataw nga sa iyang paglingkod isip pangulo sa CT-TODA, adunay 17 ka sakop nga wala na gi-renew ang serbisyo ug siya naglibog kun sila ba’ng tanan ang naghupot og mga citation tickets.
Iyang gipadayag nga dili niya ma-account kung kinsa ang naghupot og citation ticket tungod kay wala say pormal nga turn-over sa pagdumala sa maong buhatan. (BANAT NEWS)