CEBU, Philippines - Nagplano karon ang Provincial Women Commission nga mopahigayon og Oplan Tokhang sa mga gidudahang mga cybersex dens, cyber-pornography ug uban pang matang sa mga grupo o indibidwal nga nalambigit sa pangabuso sa mga kabatan-onan ug kababayen-an.
Matud ni Heda Largo executive director sa PWC nga ang maong plano nahisgotan human sa pagbisita ni Cebu Provincial Police Office (CPPO) Director Eric Noble sa buhatan ni Bise Gob. Agnes Magpale niadtong miaging semana.
Si Noble mipresentar sa kalamposan sa ‘Oplan Double Barrel Alpha sa CPPO ngadto sa buhatan ni Magpale.
Hinuon wala pay klarong detalye kun kanus-a ug kun unsaon pagbuhat sa PWC ug makig-coordinate pa sila sa CPPO sa pagtokhang sa maong mga gidudahang kriminal.
“Wala pa gyud ang final, kinahanglan sila (CPPO) man gud na mag- una then maybe we will come in later, pero wala pay definite plans as to when and where and how are we going to do it,” matud ni Largo. Atol sa courtesy visit ni Noble sa buhatan ni Magpale, ang bise gobernador nangayo og buwag nga report kun pila ang krimen batok sa mga kababayen-an ug kabatan-onan nga natala sa kapolisan.
Una nang misaysay si Magpale nga kasagaran sa pangabuso sa mga kababaenhan ug kabatan-onan may kalabotan ang illegal nga drugas, sanglit adunay mga bana nga tiggamitan niini.
“Diha mi motan-aw and mo-collaborate sa CPPO as to unsay angay namo buhaton and intervention para ma-uplift sad namo ning mga babaye nya mahaw-as didto ba,” matud ni Largo.
Siya nidugang nga tinguha nila sa ilang ipahigayon nga Tokhang mao nga mapugngan nga aduna pay mohimo og pang-abuso diri sa probinsya sa Sugbo.
“Ours is protection and prevention, kun mahimo dili mahitabo mao na ang atong buhaton. Sakit na plus dako na ang magasto and then murag tambal na atong himoon,” dugang ni Largo. (BANAT NEWS)