CEBU, Philippines - Posibleng masuspenso ang operasyon sa NTJ Water Sports Cebu nga maoy nagpaabang sa ekipo nga gigamit sa parasailing sa duha ka turistang Koreano nga nadisgrasya sa pagkaputol sa pisi sa kadagatan sa Punta Engaño, Dakbayan sa Lapu-Lapu.
Matud ni Lapu-Lapu City Disaster Risk Reduction and Management Officer Andy Berame nga irekomendar una sa City Administrator ug sa Office of the Mayor ang pagpatawag sa tag-iya sa maong ekipo.
Sumala pa ni Berame nga ang operator sa water sports nahibawo sa gale warning sa PAGASA apan wala mopatuo hinungdan nga nahitabo ang disgrasya tungod sa kusog nga hangin.
Ang NTJ Water Sports Cebu gipanag-iya ni Janny Lumaban nga usa ka Pinoy.
Nagsugod ang pagdili sa biyahe sa mga sakayan sa niaging adlaw hangtud kagahapon gumikan sa dagkong bawod.
Si Berame niingon nga dunay mga residente nga mopugos gihapon sa paglawig bisan pa sa dagkong bawod. Awhag ni Berame nga tumanon kung unsay mga pahimangno sa PAGASA aron malikayan ang disgrasya. Lendilyn Alquilos (BANAT NEWS)