CEBU, Philippines - Mas ubos ang ihap sa nahitabong sunog sa nilabay nga tuig sa rehiyon 7 kun ikumparar sa tuig 2015, apan mas taas ang ihap sa mga nakalas.
Base sa datus sa Bureau of Fire Protection 7 (BFP-7), adunay 1,246 ka fire incidents sa tuig 2015, apan 842 lang sa nilabay nga tuig, diin nius-os kini og balig 32.42 porsiyento.
Matud ni SFO1 Windell Villanueva ang tigpamaba sa BFP-7 nga daku ang ilang pagtuo nga epektibo ang gipahigayon nilang fire prevention campaign ingon man ang pakig-alayon sa kabarangayan, hinungdan nga niubos ang gidaghanon sa kaso sa sunog sa rehiyon.
Gibutyag ni SFO1 Villanueva nga ubos tuod ang fire incidents apan nisaka og 325 porsiyento ang nakalas sa nilabay nga tuig kun ikompara sa tuig 2015 kay aduna lamang kini 8 nga namatay, samtang sa 2016, 34 kabuok.
Nunot niini, giawhag ni Villanueva ang katawhan nga magpakabana ug pahimuslan ang fire safety lectures ug seminars sa mga kabarangayan aron duna silay kahibalo sa paglikay sa sunog.
Kay mag-unsa man ang programa sa BFP-7 kun walay aktibong kooperasyon ang publiko kay matud pa ang “fire safety is everybody’s concern” ug ang kuwang ug labaw na walay kahibalo sa fire safety maoy hinungdan nga makapadaku sa sunog tungod sa karatol.
Sa datus sa BFP-7 nag-una nga hinungdan sa sunog mao ang electrical connections, posporo, kandila, sigarilyo ug mga biya nga guma. Rowena D. Capistrano (BANAT NEWS)