CEBU, Philippines - Nagtinguha ang kagamhanan sa dakbayan sa Talisay nga usa ka bilyon ka pesos nga budget sunod tuig, mao nga naglaraw sila nga patas-an ang bayranan sa buhis.
Gipahibawo ni City Treasurer Emma Macuto nga dili angay mabalaka ang katawhan ingon man ang mga magpapatigayon kay sa sunod tuig pa man sab nila ipatuman ang pag-usbaw sa buhis.
Una niini si Mayor Eduardo Gullas nitataw nga sila makakuha na unya og budget nga muabot sa P1 ka bilyon base sa kantidad nga pagsaka sa ilang budget matag tuig.
Sa pagkakaron, niabot na dul-an P900 milyones ang ilang budget. Matud ni Macuto nga target sa ilang buhatan nga makakolekta og P250 milyones.Siya nagkanayon nga dili imposible ang ilang tinguha kay nisaka man sab ang ilang bahin sa Internal Revenue Allotment (IRA).
Ang ilang Revenue Code of Talisay gipalabang niadtong 2011 ug giimplementar pagkasunod tuig. Gani base sa Bureau of Local Government Finance (BLGF) sila aduna’y gahum sa pagpataas sa buhis matag lima ka tuig.
Hinuon gipadayag ni Macuto nga sabotan pa kini sa ubang department heads, konseho ug ni Mayor Gullas kun pila gyud ang ilang ipataas sa buhis.
Dili sab angay nga mabalaka ang katawhan nga magbayad og buhis kay makita ra man sab kini nila pinaagi sa mga proyekto nga ipatuman. (BANAT NEWS)