CEBU, Philippines - Tungod sa sakit nga pneumonia ug pulmonary tuberculosis, ang 57 anyos nga piniriso sa Liloan Police Station namatay niadtong Miyerkules sa kaadlawon sa Vicente Sotto Memorial Medical Center (VSMMC).
Ang maong piniriso nailhan nga si Welfredo Nudalo, taga Purok Mangga, Brgy. Tayud sa Lungsod sa Liloan.
Ang mga personahe sa Liloan Police Station uban ang mga konsehal sa barangay nga silang Alfie Pepito ug Rudy Ponce ug tanod nga si Norvin Caya kinsa maoy nidakop kang Nudalo niadtong Septiyembre 2016 gumikan sa paghupot og kutsilyo, maoy midala kang Nudalo sa Liloan Municipal Health Office alas 9:50 sa gabii niadtong Martes.
Matud pa ang hilanat ni Nudalo taud-taud na ug naglisod kini’g ginhawa hinungdan nga gidala kini sa tambalanan aron macheck-up.
Alas 12:50 sa tungang gabii niadtong Miyerkules gibalhin si Nudalo sa VSMMC.
Apan pag alas 4:40 sa kadlawon gideklarar sa doktor nga patay na.
Nasayran nga napriso sa Liloan Police Station sukad niadtong Septiyembre 20, 2016 si Nudalo samtang nag-ung-ong pa ang iyang kaso sa sala sa Municipal Circuit Trial Court ni Judge Charina Navarro-Quijano.
Matud ni Liloan Police Station chief PCIns. Franco Rodulf Oriol nga ang pamilya ni Nudalo wala mahibaw sa iyang sakit. Iyang gidugang nga posibleng nakadugang sa sakit ni Nudalo ang kahuot sa ilang prisohan human wala na pasudli og priso ang Cebu Provincial Detention and Rehabilitation Center.
“Duna mi 86 ka inmates so overcrowded kaayo. Ang ideal capacity sa among jail facility is 16 to 20 ra gyud kada silda and duna mi tulo ka silda, ang uban magduyan na lang ang uban anaa na sa hallway matog,” matud niya.
Si Oriol miingon nga ang municipal anti-drug abuse council (MADAC) mipasar og resolution nga maghangyo kang Governor Hilario Davide III nga dawaton sa CPDRC ang ilang mga inmates. (BANAT NEWS)