CEBU, Philippines - Gihimakak ni Daanbantayan Mayor Vicente Loot ang taho nga gikasab-an siya ni Presidente Rodrigo Duterte atol sa pagpatawag sa mga mayor sa Malacañang sa niaging adlaw.
Matud ni Loot nga walay bisan unsa nga bahad o hulga ngadto sa mga mayor ilabi na niadtong gilambigit sa ilegal nga drugas.
Si Loot kinsa retiradong heneral sa kapolisan ang usa sa ginganlan ni Duterte sa pipila ka higayon nga nagpaluyo sa kalihukan sa ilegal nga drugas.
Giklaro ni Loot nga wala nangasaba si Duterte ug nagpakita kini og maayong buot atol sa ilang tigum.
“When he referred to the list he always present he said something, “andyan si Loot. So what kung general sya”. He also added “andyan din si Garbo, chief of staff sana nya (pasabot ang kaatbang sa politika). Mao ra to. Wala na lain,” matud ni Loot.
Sumala pa niya nga nihangyo hinoon ang presidente sa mga mayor nga tabangan siya sa pagbungkag sa sindikato sa ilegal nga drugas sa tagsatagsa ka lugar.
Ang Department of the Interior and Local Government ang nag-imbitar sa 1,490 ka mayor sa lungsod ug 145 ka mayor sa siyudad tibuok nasud alang sa tigum didto sa Malacañang.
Ang mga mayor gibahin sa grupo diin ang unang gikatagbo sa Presidente ang gikan sa Visayas, Mindanao ug Autonomous Region in Muslim Mindanao (ARMM) samtang ang ikaduha gikan sa Luzon. (BANAT NEWS)