CEBU, Philippines - Padayunon gihapon ang Sinulog sa Barangay imbes ibalik ang Sinulog sa Kabataan sa Dakbayan sunod tuig.
Mao kini ang gipadayag ni Mayor Tomas Osmeña human siya makauyon sa mga presentasyon sa siyam ka barangay nga nisalmot sa maong indigay kagahapon.
“I was very impressed with the presentations especially the Basak San Nicolas and Barangay Labangon. This should continue,” matud ni Osmeña sa pakighinabi sa Banat News.
Nasayran nga sa mga miaging katuigan, ilahi ang elementarya ug high school nga mga estudyante nga mosayaw sa Sinulog sa Kabataan sa Dakbayan. Apan gikanselar kini ni Osmeña karong tuiga tungod sa gasto sa matag eskuwelahan ug nakaapekto ang mga pagbansay sa pag-eskuwela sa mga tinun-an.
Miuyon sab niini si Sinulog Foundation Executive Director Ricky Ballesteros nga padayunon ang Sinulog sa Barangay sunod tuig.
Matud niya nga ikaduhang tuig na karon nga adunay Sinulog sa Barangay. Unang tuig niini niadtong 2010 sa termino sab ni Osmeña. Apan gibalik ni kanhi mayor Michael Rama ang Sinulog sa Dakbayan niadtong milingkod kini isip mayor sukad 2011.
Gani, matud niya nga well-represented ang grand parade sunod semana kay adunay gikan sa eskuwelahan sa probinsya, community-based sa siyudad ug out of town contingents.
Matud ni DepEd City District Superintendent Bianito Dagatan nga favorable ang pagpadayon sa Sinulog sa Barangay sa mga eskuwelahan kay lisod alang sa mga tunghaan ang pagpangita og kuwarta alang sa contest.
Dugang ni Dagatan nga maapektuhan ang klase sa mga bata kun muapil sila sa maong indigay.
Apan matud ni Rene Ferolino ang Cultural Coordinator sa City Central School nga mas maayo ang Sinulog sa Dakbayan.
Gani nanghinaut kini nga mausab pa ang huna-huna sa mayor nga maayo unta og paapilon ang mga eskuwelahan sunod tuig. (BANAT NEWS)