CEBU, Philippines - Gitataw sa Bids and Awards Committee sa Kapitolyo nga adunay typographical error sa petsa sa notice of award sa nakadaug sa bidding sa heavy equipment nga gipirmahan ni Gobernador Hilario Davide III.
Si Jon Siegfred Sepe, pangulo sa Provincial General Services Office ug sakop sa BAC, nagkanayon nga nahulog nga duha ang NOA tungod kay nasayop ang nahatag nga kopya ngadto sa Provincial Board.
Unang NOA nga gipirmahan ni Davide gipetsahan og Oktubre 27, 2015, kapin sa usa ka tuig sa wala pa ang bidding sa P250 milyones nga pagpamalit sa heavy equipment niadtong Nobiyembre 25, 2016.
Laing NOA nga gipirmahan ni Davide gipetsahan na og Disyembre 7, 2016.
Ang duha ka NOA gi-address kini kang Ralph Clinton Tio, managing director sa joint venture sa ConEquip Philippines ug RDAK Transport Equipment nga nidaug sa bidding sa kantidad nga P227.4 milyones. (BANAT NEWS)