CEBU, Philippines - Nakagawas na sa tambalanan ang 138 ka pasyente nga nalanag sa spaghetti sa Barangay Sirao samtang liwas pa sa Pasko ang paghatag sa hinabang sa kagamhanan sa Siyudad sa Sugbo.
Nahinabi sa Banat News ang tag-iya sa Sirao Flower Farm nga si Maria Elena Sy Chua kinsa niingon nga nahuwasan gyud siya pagkahibawo nga daghan na ang nakagawas sa tambalanan ug 80 na lang ka pasyente sa Guba Hospital.
Gani pagbisita ni Chua sa Chong Hua Hospital, nagpasalamat ang mga pasyente kaniya kay wala sila gipasagdan.
“Magpaayo lang sila sa ilang lawas kay dili ko ma-discourage and I will go back to them ug pasalamat ko na nakasabot sila nako,” matud ni Chua.
Ang hospital administrator sa Cebu City Medical Center, Kenneth Siasar, nibutyag nga ang kagamhanan sa siyudad nihatag na og mga tambal ug libreng laboratory alang sa mga pasyente.
Dugang niya nga gihatagan sab ang CCMC og mga folding beds kay nagkuwang kini og mga higdaanan para sa mga pasyente.
Ang Department of Social Welfare and Services nihatag sab og libreng pagkaon alang sa mga pasyente.
Ang pangulo sa Cebu City Disaster Risk Reduction and Management Office, Nagiel Bañacia, niingon sab nga sa pagkakaron wala pa mahibaw-i kung pila na ang gasto sa siyudad kay liwas Pasko pa kini nila tukion alang niadtong nalandig sa CCMC ug lain pang gobiyernong tambalanan. (BANAT NEWS)