CEBU, Philippines - Patay ang 7- anyos nga batang lalaki nga anak og barangay tanod dihang kini napagan sa pagpamusil diha sa Sitio Latasan, Brgy. Cansaga, Lungsod sa Consolacion sa miaging gabii samtang ang bata nagtan-aw og telebisyon sud sa ilang balay. Si Police Officer 1 Ritchie Guilleran sa Consolacion Police miila sa biktima nga mao si San Niño Batucan anak sa magtiayong Marilou ug Narciso Batucan nga nagpuyo sa maong dapit.
Matud pa ni Guilleran upat ka mga armadong lalaking pulos nagtaptap sa mga nawong nga nagsakay og motorsiklo ang responsable sa kamatayon sa bata.
Matud pa ni Guilleran base sa imbestigasyon ang maong mga lalaki nangabot sa dapit ug giduol ang usa sa managkapuyo nga pulos 17 anyos nga nagpuyo sa maong dapit.
Matud pa giduol sa maong mga lalaki ang 17 anyos nga lalaki apan nakamatikod kini ug mikaratil og dagan padulong ngadto sa kabalayan.
Ang armadong mga lalaki daling nigukod ug gisigehan nila og pusil ang batan-on apan nag-ekis-ekis kini sa pagdagan hangtod nga nakapalayo kini og maayo ug nakatago sa kabalayan.
Ang amahan nga nahinabi sa Banat News miingon nga diha siya sa ilang tindahan dihang nangabot ang upat ka armadong mga lalaki sakay og motorsiklo nga nagtuo siyang mga polis nga maghimo og operasyon sa ilang dapit.
Samtang gigukod sa armadong mga lalaki ang maong batan-on matud pa niya nagsige usab og pabuto ang mga lalaki hangtud nga nakasud sa balay sa uyoan ang ilang gigukod.
Apan human sa maong mga butobuto nadungog na lamang niya ang iyang anak nga naghilak nga nagpakitabang ug nagkadugo na ang lawas.
Nasayran na lang niya nga nilapos ang mga bala sa bungbong sa ilang panimalay diin ang iyang anak nagtan-aw og telebisyon. Ang mga armadong lalaki daling nangikyas sa dapit.
Dali nilang gikarga sa sakyanan sa barangay ang anak ug gidala kini sa Eversely Child Sanitarium Hospital sa Brgy. Jagobiao, Dakbayan sa Mandaue apan tungod kay grabe ang kahimtang sa bata ang mga doktor gikatahong mitambag nga dad-on na kini og lahos sa Vicente Sotto Memorial Medical Center sa Dakbayan sa Sugbo apan pag-abot sa maong tambalanan gideklarar kini nga dead on arrival.
Matud pa sa kapolisan sa Consolacion, ang maong mga batan-on nalakip sa listahan sa drug watchlist sa lungsod. Gidudahan nila nga nalambigit sa ilegal nga drugas ang motibo sa suway paglikidar kanila. (BANAT NEWS)