CEBU, Philippines - Dead on arrival sa Cebu Provincial Hospital sa Dakbayan sa Danao ang duha ka gipasanginlang mga notadong drug personalities human nakigpinusilay sa mga sakop sa Danao City Police atol sa buy-bust operation sa Sitio Iyala, Brgy. Guinacot sa maong dakbayan kagahapon sa hapon.
Ang duha giila nga sila si Omar Miculo Baguio, taga Brgy. Suba ug Rey Andrew Banzon, taga Brgy. Guinacot sa maong siyudad, parehong mitahan sa Oplan Tokhang sa kapulisan sa nanglabay nga mga bulan.
Ang hepe sa Danao City Police, Sr. Insp. Alejandro Batobalonos nga nahinabi sa Banat News mihulagway sa duha nga mga idlas ug kapin na sa usa ka bulan nila nga gipanid-an.
Matud pa ni Batobalonos magsakay og kotse unya kung mahatag na ang drugas dali sab dayon nga mopabulhot sa sakyanan ang estilo sa duha. Sigun pa sa hepe sa kapulisan sa Danao nga nakakuha og impormasyon nga kanunay magdala og armas ang duha ug nanganti nga mosukol sa mga polis.
Kagahapon sa hapon napalitan sila og P15 mil nga shabu apan nakabantay ug nanagan paingon sa usa ka abandonadong balay ug didto nakigpinusilay apan nadisgrasya sila sa mga polis.
Nakuha sa mga polis gikan sa mga suspetsado ang duha ka .38 revolvers ug shabu nga mikantidad sa P123, 900 ang awto nga Toyota Corolla.
Si Batobalonos mitug-an nga ang leader sa duha nagpuyo kaniadto sa Danao apan nibalhin na sa Liloan. Usa sa mga sakop sa maong grupo ig-agaw ni Alvaro Alvaro, alyas Barok.
Sigun pa ni Batobalonos nga sa iyang nakita dili gayod garantiya nga kung motahan ang usa ka drug suspect kini moundang na gayod sa pagbaligya o paggamit og drugas.
“Kanang uban respeto ra na ilaha o napugos, pero sila ang bahala basta kami diri trabaho ra pud ning amoa,” saysay pa Batobalonos. (BANAT NEWS)