CEBU, Philippines - Suportado ni Cebu City Mayor Tomas Osmeña ang umaabot nga Miss Universe Swimwear Competition nga ipahigayon sa JPark Island Resorts and Waterpark Cebu karong Enero 17.
Ang siyudad sa Sugbo andam moabi-abi sa mga kandidata sa Miss Universe kung mobisita sila sa nagkalain-laing tourist spots sa siyudad ilabi na sa mga heritage sites.
Nasayran nga gipaundang ni Osmeña ang Miss Cebu Pageant nga kabahin sa kalihukan sa Sinulog Festival matag tuig. Si Osmeña nipasabot nga ang Miss Cebu dakung kwarta sa kagamhanan sa siyudad ang mabubo alang niini ug matud pa kalas lang kini og kwarta kay giingong ang mga elitista lang ang mga makabenepisyo niini.
Alang kaniya mas maayong hulipan ang Miss Cebu og Festival Queen nga mas nindot kaysa Miss Universe sanglit ang mga kandidata kung mosayaw sa entablado uban niini ang mga dancers ug mosalmot usab kini sa parade.
Ang siyudad dili direkta nga mohupot sa swimwear competition sa Miss Universe apan nisugyot ang mayor nga mopahigayon og “Festive Lunch” diin ipakita ang tanang Cebu cuisines.
Sigun ni Arthur Lo, corporate liaison officer sa JPark Island Resort and Waterparks nga bukas ang Festive Lunch sa tanang restaurant apan ang host mopili sa labing lamian nga pagkaon nga itanyag sa mga kandidata. Usa lang ang Festive Lunch sa mga ticketed events nga mahitabo sa samang adlaw.
Ang laing upat ka kalihukan mao ang General Assembly diin gilauman ang tanang kandidata mopailaila sa ilang kaugalingon, Swimwear Competition, Dinner diin ipakita ang mga iladong pagkaon sa Dakbayan sa Lapu-Lapu ug ang After Party ug kining tanan pulos ticketed events.
Sa Dinner ang mga kandidata mopakita sa mga ginamang mga senina sa mga local designers hinuon wala pa gianunsiyo kung pila ka local designers ang mosalmot. Gipaabot nga sa sunod semana mahibaw-an kung pila ang presyo sa mga ticket alang sa lima ka kalihukan.
Subay niini, ang chairman of the board sa maong resort, Justin Uy, niingon nga ang pagpahigayon og Festive Lunch usa ka oportunidad aron ikapasigarbo ang mga lamian nga mga Pinoy foods alang sa mga kandidata sa Miss Universe ug makatabang usab kini sa pagpalambo sa turismo. Ang chief executive officer sa JPark, Jason Uy, niawhag sa tanan nga manginlabot ug ipakita ang talagsaong ideya alang sa umaabot nga kalihukan aron mahimo kining malampuson. (BANAT NEWS)