CEBU, Philippines - Nahimuot si Talisay City Mayor Eduardo Gullas nga wala gyud makalusot sa mga kamot sa jail guard sa Talisay City Jail ang usa ka babaye nga nisuway sa pagpalusot og ginadiling drugas.
Si Gullas nibutyag nga iyang gikonsiderar ang maong kalambuan nga maoy tubag sa iyang mando ngadto ni Chief Insp. Josephus Jelianggao, and warden sa city jail.
Matud niya nga dili na bag-o nga ang mga prisohan nga gipadagan sa local government units mga drug-free tungod kay halos tanan aduna gyu’y makalusot.
Pero sa pagkasikop ni Marigold Aquino, 19-anyos, taga Barangay Tabunok, mao ang nitubag sa iyang pakig-estorya ni Jelianggao.
Si Aquino nibisita sa iyang kapuyo nga si Junnavel Lopez nga nabilanggo tungod sa kasong paghupot og ilegal nga armas niadtong Septiyembre 8.
Apan si JO1 Sheila Vesada ang nakakita og drugas sulod sa iyang bag nga moabot sa 12 gramos.
Wala maglangay iyang gisikop si Aquino ug gipasakaan og kaso ug mag-uban na unya sila sa iyang kapuyo sulod sa bilanggoan. (BANAT NEWS)