CEBU, Philippines - Nasikop na ang suspek sa pagpatay sa magtutudlo sa Pilar National High School sa Isla sa Camotes nga si Jerome Batiguas.
Ang mga sakop sa Consolacion Police Station ang nakasikop nilang Joshua Ybañez, 20-anyos ug usa ka 16-anyos nga lalaki atol sa follow-up operation sa Purok 8, Barangay Cansaga sa maong lungsod
Ang minor de edad giingong maoy nakit-an nga katapusan nga kakuyog ni Batiguas.
Matud ni Senior Police Officer 2 Francisco Perez nga unang gisubay ang 16-anyos ug nitug-an nga si Ybañez maoy nagpatay sa biktima.
Nakuha ang cellphone ug tsinelas sa biktima gikan kang Ybañez.
Giandam na karon ang pagsang-at og kaso batok sa mga dinakpan. Ang pagkasikop sa mga suspek gihangop sa mga magtutudlo ug tinun-an sa Pilar National High School.
Matud ni Gerald Martinez, kanhi tinun-an sa maong magtutudlo, nga nalipay sila sa naangkon nga hustisya apan sakit gihapon alang kanila ang pagkawagtang ni Batiguas kinsa gihulagway nga usa ka maayong magtutudlo nga pinangga sa tanan.
Ang patay’ng lawas sa biktima nakit-an na lang sa sapa sa Lamac, Lungsod sa Consolacion human giingong gidunggab ug gitulis sa mga suspek.
Ang minor de edad niingon nga ang biktima gusto unta nga makighilawas sa suspek kinsa nangayo og kwarta apan gibalibaran ug gipangayo ang cellphone apan nagdumili gihapon hinungdan nga gidunggab ug namatay. (BANAT NEWS)