CEBU, Philippines - Gimando ni Ombudsman Conchita Carpio-Morales nga pasakaan og kasong kriminal si kanhi Talisay City mayor Johnny V. delos Reyes tungod sa pagtudlo niya og presidente sa Talisay City College nga walay pagtugot sa Board of Trustees.
Kaso nga falsification ang gusto ni Morales nga ipasaka batok ni delos Reyes tungod kay niisyu kini og executive order (EO) nga nagtudlo ni Dr. Paulus Mariae Cañete nga acting president sa TCC nga walay pagtugot sa board.
Gisalikway sa mga anti-graft investigators ang argumento sa kanhi mayor nga “in good faith” ang kalapasan nga iyang nahimo nga pagtudlo ni Cañete sa pwesto.
Matud ni Morales nga klaro kaayo sa minutes sa tigum sa mga sakop sa Board of Trustees sa TCC niadtong Disyembre 10, 2013 nga wala hatagi og pagtugot si delos Reyes nga makatudlo og college president o bisan ang pagtudlo og officer-in-charge.
Sumala pa sa Ombudsman nga giabusohan ni delos Reyes ang iyang gahum tungod kay bisan og siya maoy chairman sa Board of Trustees apan dili siya makabuot-buot pagtudlo og presidente.
Namatud-an pa gyud gani sa Ombudsman nga si delos Reyes nakahimo og simple dishonesty mao nga gihatagan siya og pasidaan nga sa sunod higayon nga makahimo siya og susamang salaud, bug-at nga silot ang iyang atubangon.
Si delos Reyes nga napilde ni Mayor Eduardo Gullas sa eleksyon niadtong Mayo 9 gipaabot nga pasakaan og kasong kriminal adto na sa hukmanan. (BANAT NEWS)