CEBU, Philippines - Baho ug niburot na ang lawas sa 24 anyos nga babayeng call center agent nga gituohang naghikog sulod sa iyang lawak nga giabangan sa may Limbong Street, Barangay Mabolo, dakbayan sa Sugbo pasado alas 2 sa nakalabay nga hapon.
Ang maong babaye giila nga si Marichu Carillo, dalaga ug lumad nga taga Baybay City, Leyte.
Sa imbestigasyon sa homicide section sa Cebu City Police Office nga gipangulohan ni PO3 Geoffrey Gutual nasayran nga posibling kapakyasan sa gugma ang hinungdan sa paghikog sa dalaga.
Nasayran sa kapolisan gikan sa igsuon niini nga ilang nahinabi sa telepono nga niadtong Nobiyembre 4, ang biktima nagpahibalo kaniya nga gusto kining maghikog kay gikasab-an kini sa iyang uyab nga Amerikano nga si alyas “Matt” sa sulod sa iyang gitrabahuan ug atubangan sa iyang mga katrabaho.
Ang kauban sa trabaho sa biktima nga nahinabi sa mga polis nitug-an sab nga niadtong Nobiyembre 3 iyang naistorya si Carillo ug kini nihilak kay nagbuwag na sila sa iyang uyab nga langyaw.
Dugang pa sa maong kauban nga misamot ang kaguol sa dalaga kay gipangkuha sa langyaw ang tanan niini nga personal nga butang lakip na ang iyang kwarta.
Pasado alas 4 sa hapon niadtong Nobiyembre 4 nagpadala sab og mensahe sa Facebook ang dalaga sa iyang higala nga nag-ingon nga gusto kining magpakamatay.
Lakip sa maong mensahe nga gusto niyang pahibaw-on ang langyaw kun unsa kadaku ang iyang gugma alang niini lakip na ang iyang pamilya.
Nadiskubrehan ang patay’ng lawas sa dalaga sa iyang silingan nga si Dennis Señar nga dali sab nga nangayo og pakitabang sa mga polis.
Sulod sa lawak nakita sa kapolisan ang lawas sa dalaga nga nagbitay gamit ang electrical cord nga iyang gihikot sa kilid sa bintana.
Matud sa kapolisan nga wala silay nakitang foul play sa hitabo ug sila nagtuo nga naghikog gyud ang dalaga gumikan sa depresyon. (BANAT NEWS)