CEBU, Philippines - Ang mga miyembro sa kooperatiba sa Isla sa Comotes gidasig sa Cebu Provincial Cooperative Affairs Office (PCAO) nga ikonsidera ang pag-invest sa cacao industry tungod kay misaka ang global demand niini.
Atol sa gipahigayon nga duha ka adlaw nga coops mandatory training nga gipahigayon sa lungsod sa San Francisco, Camotes Islands, si Danilo Villamora, PCAO officer nagkanayon nga adunay mga lakang nga gihimo aron ang Sugbo mahimong cacao-producing province diin makahatag kini og benepisyo ngadto sa mga Sugbuanon ilabi na sa mga gagmay nga mag-uuma.
Ang mandatory coop training usa ka regular nga kalihukan sa kagamhanan sa probinsiya aron matabangan sa pag-facilitate ang mga kooperatiba sa ilang mga gikinahanglan sa entrepreneurial objective.
Subay niini, ang Department of Agriculture nibutyag nga gibana-banang muabot ngadto sa lima ka milyon metric tons (MT) ang global demand sa cacao beans sa tuig 2020. Ug tungod niini aduna unya’y deficit nga usa ka milyon nga MT sa global supply.
Ang Kennemer Foods International (KFI) nga usa ka agri-business company nga nagbase sa Davao nibutyag nga tulo ka kooperatiba sa probinsiya ang ni-invest og milyones ka piso sa cacao-farming sukad niadtong tuig 2015.
Ang mga investing coop gilangkuban sa Lamac Multi-Purpose Cooperative (LMPC), Compostela Market Vendors Cooperative ug Sibonga Multi-Purpose Cooperative.
Si Virginio Jamon, pangulo sa KFI Agri-Credit nagkanayon nga ang KFI gikonsidera sa mga kooperatiba nga “captured market” diin ang negosyo niini mao ang pagpamalit og mga pinauga nga liso sa cacao.
Si Roy Tolibas Bosque, LMPC Cacao focal person nipasabot nga ang mga gagmay nga tag-iya og umahan pweding mananom og cacao ug ibaligya nila ngadto sa KFI pinaagi sa clustering sa mga lugar sa probinsiya.
Ang usa ka cluster, equal kini ngadto sa 30 ka ektarya nga luna og 30 mil ka punoan sa cacao.
Matud ni Bosque nga ang mag-uuma nga nananom og laing produkto sama sa lubi ug mangga pweding makatanom og cacao tungod kay gamay nga lugar lang gikinahanglan niini ug 30 porsyento nga silaw sa adlaw aron mabuhi ug motubo ang cacao. Ang cacao mahimong itanom ilawom sa kalubihan ug kamanggahan.
Ang usa ka local cacao farmer nga adunay usa ka ektaryang luna mokita kini og P200 mil matag tuig diin taas kini kun ikompara sa abot sa mangga, lubi ug palm oil.
Dugang niya nga ang Land Bank of the Philippines nipagawas og P65 milyones nga loans nga start-up capital alang sa cacao industry. (BANAT NEWS)