CEBU, Philippines - Sabutan sa grupong People’s Initiative Homeowners Association kun unsay sunod nilang lakang subay sa demolisyon nga gihimo sa Prevention Restoration Order, Beautification and Enhancement (PROBE) Team sa ilang kabalayan sa Osmeña Shrine sa Brgy. Kalunasan, dakbayan sa Sugbo.
Sa buhatan ni Vice Mayor Edgardo Labella, nakigtagbo kagahapon ang maong grupo uban silang Konsehal Jose Daluz III ug Konsehal Pastor “Jun” Alcover. Kahinumduman nga bisan pa man sa ilang pagsupak nadayon ang pagguba sa kabalayan. Gipasabot ni Daluz nga kun ang mga residente mopasaka og kaso batok sa siyudad, dili sila makatabang kay adunay conflict of interest, apan kun mopasaka sila og kaso batok sa mga tawo nga nag-order sa demolisyon nga wala magsubay sa balaod, makatabang sila. Lakip nga giklaro sa konsehal nga ang maong lugar, gi-donate na sa siyudad sa Evangelical Coalition in Cebu niadtong tuig 2010 maong matawag na kini nga private property. Kahinumduman nga himoon unta nga lubnganan ang maong lugar apan wala madayon human usab babagi.
Subay niini, si Konsehal Alcover niingon nga mangita siya og paagi kun unsaon nga mabawi sa siyudad ang maong lugar aron ang dakbayan na ang mougmad niini. Kay alang niya anugon kun pasagdan lang ang dapit. Si Randy Sabucedo, vice president sa maong asosasyon niingon nga planuhan pa nila kun unsay sunod nga lakang nga himoon human sa maong panagtagbo. Hangyo niya kang Mayor Tomas Osmeña nga unta dili sila pasagdan ug papahawaon nga sama sa usa ka hayop dungan sa pagbutyag nga dili sila supak nga mohawa sa lugar apan pangitaan unta sila og desenteng kabalhinan. (BANAT NEWS)