CEBU, Philippines - Girelibohan sa iyang pwesto ang direktor sa Cebu Provincial Police Office human kini gikatahong nalambigit sa mga nalista sa mga drug protectors nga gibutyag ni Albuera Mayor Rolando Espinosa.
Si Sr. Supt. Jose Macanas nahimong CPPO director sulod pa lang sa kapin duha ka bulan gimandoan sa Camp Crame pag-report didto. Kini gikompirmar ni Chief Supt. Noli Taliño ang director sa Police Regional Office-7 dungan sa pagpahibalo nga si Macanas hulipan ni Sr. Supt. Eric Noble nga gikan sa Police Regional Office-1.
Si Taliño ang mipahibalo usab dayon sa maong kalamboan ngadto ni Gov. Hilario Davide III diin epektibo kagahapong adlawa ang pagrelibo ni Macanas kay aron dili na sab mahibulong si Davide kung adunay bag-ong provincial police director.
Si Taliño miangkon nga wala gayud siya’y kasayuran sa pagkalambigit ni Macanas sa listahan ni Espinosa.
Si Macanas kanhi direktor sa kapulisan sa Dakbayan sa Ormoc ayha kini nadestino sa Highway Patrol Group sa Camp Crame hangtod nga kini nadestino sa CPPO hulip ni Senior Superintendent Clifford Gairanod.
Gitug-an ni Taliño nga iyaha nang naestorya si Macanas ug kini miingon nga nasurprisa kini nganong naapil siya sa lista. “Maganda ang accomplishment niya, top performer ang CPPO sa double barrel sa region,” sigun pa ni Taliño.
Si Taliño miingon nga andam usab si Macanas pagtubag sa pasangil batok niya ug husto usab kini sa dala nga mga dokumento sa pagsuporta sa iyang paghimakak sa alegasyon.
Si Davide sa iyang bahin gianugonan kang Macanas tungod kay maayo kini sa iyang trabaho ug gani dako ang accomplishment sa CPPO sa kampanya batok ilegal nga drugas sud lang sa duha ka buwan niining paglingkod.
Si Espinosa kinsa giingong nalambigit sa sindikato sa ginadiling drugas misurender ngadto kang Chief PNP Ronald dela Rosa niadtong buwan sa Agosto niining tuiga.
Apan ang anak niining si Rolando “Kerwin” Espinosa padayon pang gipangita sa kapolisan.
Adunay pagduda nga nagdumot ang mayor kang Macanas tungod kay kauban man kini dihang gisikop sa mga sakop sa CIDG ang grupo sa mga gidudahang drug suspects apil si Kerwin didto sa Ormoc City sa milabay’ng tuig. (BANAT NEWS)