CEBU, Philippines - Aron unya makabaton og alternatibong pangitaan, ang training program nga gitanyag sa Cebu City Government uban ang Technical Education Skills Development Authority (TESDA) itanyag na usab ngadto sa mga PUJ drivers inubanan sa suporta sa Department of Transportation (DOT).
Ang maong programa gibuksan sa kagamhanan sa siyudad sa Sugbo pinaagi sa Cebu City Transportation Office (CCTO) alang ngadto sa mga drayber sa jeep de pasaheruan nga maapektuhan unya sa pagpatuman sa Cebu Bus Rapid Transit (CBRT).
"We have decided to open the TESDA program to the drivers of the affected routes in order to widen the pool of interested persons to apply in the program,” suma pa ni Atty. Rafael Yap ang pangu sa CCTO.
Nasayran nga gamay ra ang nagparehistro sa CCTO alang sa training program sa mga operator sa pag-implementar unya sa CBRT.
Sa talaan sa maong buhatan, 34 ra ang nagparehistro sa gitanyag nga 550 ka slots. Una nang gipahibawo ni Yap nga lisod kombinsiron ang mga operator nga moparehistro sa training program. Ang pagparehistro nagsugod niadtong Agusto 22 ngadto sa Septiyembre 23. Tungod niini magpadayon hangtod sunod buwan ang pagparehistro sa training program.
Ang TESDA mitanyag og 17 ka kurso ug ang mga kwalipikadong drayber mao kadtong nagsubay sa rota nga 04-H, 06-D, 06-F, 07-D, 09-C, O9-F, O9-G, O9-H, 10-C, 10-D, 10-E, 10-F, 10-G, 10-M, 11-D, 12-B, 12-D, 12-J, 12-L, 12-M, 14-B ug 14-D.
Suma pa ni Yap, wala silay datos kun pila ang mga apektadong drayber sa siyudad.
Ang pagparehistro ipahigayon sa Cebu Bus Rapid Transit Project Implementation Unit Office nga anaa sa 2nd flr. sa F. Ramos Market, Echavez Ext., Brgy. Cogon Ramos.
Ang DOT muhatag og allowance sa mga musalmot sa training nga nagkantidad og P340 matag adlaw. (BANAT NEWS)