CEBU, Philippines - Subay sa kampaniya batok ginadiling drugas ug drug-free workplace, ang mga kawani sa Lungsod sa Argao matag buwan nga ipaubos sa drug test.
Si Mayor Stanley Caminero nibutyag nga sa nilabay’ng administrasyon, dunay 160 ka job order personnel kinsa nahuman na ang kontrata nga gi-renew nila. Apan una sila nakabalik gipaubos sila sa drug test ug usa kanila kinsa babaye ang nagpositibo.
Gawas sa mga JO, lakip ang mga regular nga kawani ang gipaubos usab sa drug test.
Matud sa mayor nga samtang wala pa maapil sa ilang budget ang pagpaubos sa drug test sa mga kawani, ang mga sobrang drug testing kit alang sa mga kawani sa ilang mining company mao una ang ilang gigamit.
Matud ni Caminero nga matag buwan niyang ipaubos sa drug test ang mga kawani sa lungsod aron magmatngon sila nga dili gyud mogamit og ginadiling drugas tungod kay ang masakpan nga magpositibo mapalagpot kini sa ilang trabaho.
Ang kagamhanan sa lungsod nitabang usab alang sa community rehabilitation sa mga drug surrenderees ubos sa koordinasyon sa Department of Health (DOH) ug ubang ahensiya.
Ang Barangay Poblacion ang pilot barangay sa community drug rehabilitation.
Dugang ni Caminero nga nikabat sa 1,400 nga nalambigit sa ginadiling drugas sa ilang lungsod ang nisurender ug gipaubos pa sila sa profiling karon. (BANAT NEWS)