CEBU, Philippines - Gikatakdang desisyonan karon ni Talisay City Mayor Eduardo Gullas kun magpabilin pa ba o dili si Supt. Aileen Recla isip hepe sa kapolisan sa siyudad human sa usa ka buwan nga siya ninglingkod sa puwesto.
Ang usa ka buwan ni Recla maoy gitagal ni Gullas ug molungtad lang og dugay ang iyang pagka-hepe kung ang mayor mahimuot sa iyang ipakitang labok.
Nagkanayon si Gullas nga dili lang una siya mangayo og lima ka pangan sa mga polis opisyal nga iyang pilian nga mahimong hepe sa dakbayan tungod kay iya pang gimanduan si Recla sa pagduso og report labot sa iyang mga nahimo sulod sa usa ka buwan.
Gipasusi usab ni Gullas ang mga binuhatan ni Recla. Dugang pa sa mayor nga kung graduhan niya si Recla hayan iya kining tagaan og 6 puntos gikan sa 10 nga labing taas.
Si Gullas sa sayo pa nipadayag sa iyang kasagmuyo human gihulipan si Supt. Germano Mallari ni Recla nga wala gani siya konsultaha sa kadagkuan sa kapolisan.
Siya niingon nga isip mayor aduna gyud siyay standard sa usa ka hepe o bisan kinsa sa iyang sakop sa City Hall. (BANAT NEWS)