CEBU, Philippines - Nag-una ang Police Regional Office-7 lukop nasud sa performance sa Oplan Double Barrel base sa National Anti-illegal Drug Monitoring Center.
Nakahimo og daghang lehitimo nga operasyon ang kapolisan sa rehiyon diin dunay 12 ka search warrant, 27 ka warrant of arrest, 545 ka buy-bust operations diin ang tanan niabot sa 998 ka operasyon.
Adunay 696 ka pushers ug 779 ka users ang nasikop. Niabot usab sa 3,539.41 gramos ang tanang nasakmit nga ilegal nga drugas nga nagkantidad og P41,763,858.00
Tanang nabisita nga balay niabot og 48,748 ug 67,312 ka users ug 4,985 ang pushers ang napatahan ubos sa Oplan Tukhang.
Sa tanan, 86.62 porsiyento niini mga lalaki nga pushers, 10.1 porsiyento mga babaye ug 3.38 porsiyento mga minor de edad samtang 92.31 porsiyento nga mga lalaki, 1.96 porsiyento mga babaye ug 5.73 porsiyento mga minor de edad nga users.
Ang kadaghan sa mga minor de edad nakapaalarma sa kapolisan ug Department of Social Welfare and Development (DSWD).
Matud ni Senior Supt. Jose Macanas, director sa Cebu Provincial Police Office (CPPO), nga adunay 1,410 ka minor de edad kinsa ang labing bata nag-edad og 8-anyos nga tiggamitan sa ginadiling drugas.
Kadaghanan sa mga batan-on mga out-of-school youth samtang mga estudyante sa primary level adunay 74 nga nisurender.
Ang kapolisan nakig-alayon sa DSWD sa mga programa nga makatabang kanila ug sa mga ginikanan. (BANAT NEWS)